Nú árið er liðið

Gleðilegt ár og takk fyrir gömlu góðu.

Aftur er komið nýtt ár í öllu sínu veldi, þegar ég vaknaði á nýjársmorgun óskaði ég þess heitt að árið yrði í samræmi við veðráttuna sem ég andaði að mér í Bjarnardalnum. Stilla, friður og sólin vermdi fjallatoppa og beið þess í ofvæni að senda okkur geisla sína núna í byrjun þorra.

Árið sem við erum að kveðja hverfur í spjöld sögunnar og verður minnst vegna öfga sinna í náttúrunni sem og í afrekum okkar þjóðarinnar, hvort sem það er í efnahagsmálunum, menningu eða íþróttum. Trausti Jónsson veðurfræðingur sagði í fréttunum áðan að það væri gömul sögn að veðráttan fylgdi jafnan efnahagsmálum þjóðarinnar. Æ held það sé ekki rétt eða það er réttara sagt öfugt ,efnahagsástand þjóðarinnar hefur fylgt veðráttunni enda ekki nema von þar sem landinn hefur alltaf átt allt sitt undir náttúrunni og þá verður afkoman í samræmi við þá hlið sem hún snýr að okkur.

Hörður Torfason sagði í fréttum  áðan að hann óttaðist að ef að stjórnmálamenn færu ekki að segja af sér og axla ábyrgð þá myndi mótmæli harðna með tilheyrandi ofbeldi og skemmdaverkum. Mér fannst satt að segja þetta hljóma eins og hótun. Aðgerðir á gamlársdag við Hótel Borg fannst mér setja svartan punkt á árið. Er þetta það sem koma skal?. Ég skal fegin standa í fremstu röð í friðsamlegum mótmælum á Austurvelli dag eftir dag, en þessar aðgerðir báru með sér ofbeldi og yfirgang sem er hálfu verri en aðgerðaleysi stjórnvalda og fjármálaeftirlits á liðnum mánuðum.

Það var í seinni heimsstyrjöldinni að gömul kona sat á rúmi sínu í baðstofunni og hlustaði stillt á fréttir sem bárust utan úr heimi af stríðsrekstri og ófriði þá hristi hún hausinn og sagði stundarhátt " það endar með því að þeir meiða einhvern í þessum látum" ja svei mér ekki ég held það endi með því.

 

 

 

Athugasemdir

[Spákonan á Kambinum (IP-tala skráð) 2.1.2009 kl. 22:00]

Aðgerðirnar á Gamlársdag voru náttúrulega alveg út í hróa og þvílík heimska....veit ekki hvað er að fólki!!!! Svei og svei segi ég.

En eigðu gott ár framundan með fjölskyldunni og munið að þið eruð ávallt velkomin norður á Krók þar sem einungis eru birnir og menn sem fá sér skyndi BITA.......reyndar þann dýrasta í sögunni......en gott er að vera þar og þið hjartanlega velkomin :)