Smalamennska

Margar leiðir og aðferðir eru í boði þeim sem þurfa að fá útrás fyrir reiði eða bældar tilfinningar. Fólki bjóðast dýr námskeið, öskurnámskeið, líkamsræktarkort og fleira, þar sem hægt er að stinga á troðfulla tilfinningaskjóðuna og fá ró í sálartetrið. Það sem ég tel vera nokkuð vanmetið til þessara verka, eru smalamennskur. Nú á haustdögum standa yfir smalamennskur um allt land. Bændur keppast við að laða til sín fótfráa vini og vandamenn til að hlaupa eftir þessum fáeinu skjátum sem enn bjóðast það frelsi að fá að njóta íslensku afréttanna frá fjöru til fjallatoppa.

Þær eru ekki allar sáttar að snúa aftur til lögheimilla sinna, enda vita þær sínu viti að þar bíða þeirra aðeins eitt, að láta frá sér afkvæmi sín svo landinn geti étið til þess eins að hann þurfi að kaupa sér fleiri líkamsræktarkort.

Það að komast í smalamennsku er ein besta og sneggsta leið til að fá ró í sálina, hreyfingu á kroppinn og útrás fyrir innbyggða reiði. Menn geta öskrað, skammast, sagt næsta manni að halda kjafti (að fullum krafti) beðið guð fyrir þann næsta og bölvað óvini í fjarska. Allt sleppur þetta út í náttúruna. Það besta er að engin mengunarkvóti hefur verið settur á allan þennan útblástur sem rýkur upp af manneskjunni við þessar aðstæður.

Setningar eins og "ertu blindur hálfvitinn þinn?" , "kemstu ekki úr sporunum asninn þinn?", "skjóttu hundandskotann" og "ertu þroskaheftur?"  hafa flogið og skollið  dalanna á milli og endurkastast sem bergmál til sjávar. Öll þessi orð og annar belgingur eru gleymd og horfnar með sunnanrokinu þegar reksturinn kemur saman og sameinast til réttar.

Þá eru menn kátir og reifir, þó nokkrir hundar eigi eftir að gera upp einhver mál sín á milli enda ekki hist, margir hverjir, síðan um síðustu göngur.

Þessi hreinsun dugar mönnum oft langt fram á næsta ár.

Mér finnst að bændur ætti að selja aðgang að smalamennskum.

Athugasemdir

[Helga Dóra (IP-tala skráð) 3.10.2007 kl. 11:21]

Hæ, þetta er góð hugmynd   En annars, takk fyrir hjálpina í smölun um síðustu helgi, það er ekki að spyrja að kraftinum í "Þvergerðingum" þegar kindur og smalamennskur eru annarsvergar.

 Kveðja HDK

[Harpa J (IP-tala skráð) 3.10.2007 kl. 16:15]

Ég held að það sé aðeins farið að gera það hérna á suðurlandinu. Allavega var einhver bóndinn með hóp á túristum í göngum um daginn. Þú ,,bara" gengur í að markaðssetja þetta kona, alvöru göngur á westfjörðum hljóta að seljast, það er ég viss um.

[Bessa (IP-tala skráð) 6.10.2007 kl. 12:36]

Hahahahaha

[Spákonan á Kambinum (IP-tala skráð) 9.10.2007 kl. 14:35]

KærI Halla (i) Vissi ekki að þú værir byrjuð að blogga aftur :) Ég var alltaf að kíkja á síðuna þína í sumar en aldrei var neitt!! Nú hef ég setið við og lesið frá því þú byrjaðir aftur að blogga og endaði á blogginu þegar þú fórst í bakaríið :) Hló mig máttlausa og hlæ enn :) Þú ert sko ótrúlega fyndin kona (já ekki kall)

Skemmtilegt að pabbi þinn sem ég man auðvitað mjög vel eftir, að hann og Bergljót Ásta mín eigi sama afmælisadag:)

Við fengum ekki að hefna okkar á löggukonunum í þetta sinnið en vonandi seinna :) Hafðu það gott í B-víkinni :)

[Svanbergis (IP-tala skráð) 13.10.2007 kl. 23:50]

Það er sem sagt notað svipað málfar í smalamennskunni og þegar sumir eiga eftir að skipta um rafgeymi.