Pistill fluttur á 1. maí á Ísafirði

Vorið kom hlæjandi
hlaupandi
niður hlíðina vestan megin.
Engri sjón hef ég orðið jafn bundinn
og alls hugar feginn.

Ég tók það í fang
og festi mér það
sem fegurst og best ég þekki.
Mánuður leið,
mannsaldur leið,
og ég missti það ekki.

Góðan daginn og gleðilega hátíð.

Ljóðlínurnar sem ég las urðu Guðmundi Inga skáldi að orði í upphafi sjötta áratugarins. Hann var ekki endilega að tala um árstíðina heldur að hann hefði fest sér konu sem komið með vorið í fang hans, enda 18 árum yngri.

Rót kom á huga minn í gær þegar ég sat hérna í þessum sal,- á frábærri og tímabærri ráðstefnu um tækifæri, aðstæður og samkeppni fyrirtækja á Vestfjörðum. Ég stakk mér hér inn úr vorviðrinu fyrir utan til að hlíða á áhugaverða fyrirlestra. Þegar ég fór út var ég ekki viss hvort ég var með vorið í fangið, haustið eða hreinlega vetrarhörkur vestfirskrar búsetuframtíðar.

Vestfirðir hafa verið byggðir frá landnámi, af duglegu, sterku og bjargálna fólki. Allt fram á þennan dag höfum við verið sjálfum okkur nóg um það að hafa í okkur og á.

En tölur tala sínu máli, fólksflótti er staðreynd og ekkert þýðir að stinga hausnum í sandinn og neita að horfa á staðreyndir. Við höfum alltaf getað státað okkur af litlu atvinnuleysi en það hefur auðvitað verið á kostnað þess að fólk hefur tekið sig upp og flutt í burtu í leit að atvinnu, námi og þá í framhaldinu, vinnu sem hæfði menntun fólks.
En eigum við þá ekki bara að fara að dæmi Grunnvíkinga þegar þeir ákváðu á einum fundi að hætta þessu veseni hætta búsetu á svæðinu og flytja burt en hvurt? Er nóg að fara? Er grasið svona grænt hinu megin að allir hafi þar nóg?

Það kom fram í gær, í framsögu Vífils Karlsonar hagfræðings að við, - landsbyggðin værum að leggja meira til þjóðarkökunnar heldur en við neyttum af henni. Við værum að afla ca. 27% (prósenta) af tekjum ríkisins en ríkið væri að eyða 15% þeirra í samneyslu á landsbyggðinni. Þetta styrkir okkur í þeirri trú að við erum ekki bara þiggjendur í samneyslunni heldur gefendur. Sælla er að gefa en þiggja.

En við megum ekki festast í þeirri sjálfsumgleði, heldur verðum við að einblína á það að við Vestfirðingar erum Þátttakendur. Fullkomnir þátttakendur í samfélaginu. Meðan svo er þá erum við fullkomlega fær um að snúa þessari byggðaþróun við eða alla vega, að reisa varnarmúr gegn frekari hnignun. Ég held það geti verið hluti af vandanum að við höfum verið sannfærð um að partur af þessu öllu sé, að það er búið að koma því inn í undirmeðvitund okkar að við séum dragbítar og þurfalingar á vaxtasvæðum landsins og að við stöndum framförum og hagvexti þjóðarinnar hreinlega fyrir þrifum.

Fyrir 40 árum náðist sá sigur í áratugabaráttu íslendinga að fá handritin heim. Nú ættu Vestfirðingar að hefja sameiginlega baráttu að fá störfin heim aftur, þau störf sem hafa flust burt og líka þau störf sem verða til fyrir tilstuðlan þess opinberra en ná aldrei lengra en 70 kílómetra radíus frá Reykjavík

Dagurinn í dag er helgaður vinnandi stéttum eða verkalýðnum. Barátta þeirra í gegnum tíðina fyrir tilveru sinni er ekkert ósvipað og okkar vestfirðinga. Atvinnurekendur líta á hina vinnandi stétt sem þiggjendur og sig sjálfa sem gefendur. Þetta hefur fengið byr undir báða vængi undanfarna vikur í samningaferlinu. Kröfur stéttarfélaganna eru „ónáttúrulegar“ og skilningur þeirra enginn á vel varðan veg þjóðarinnar í gegnum kreppuna. Allar launakröfur eru, að mati atvinnurekenda, til þess að leggja stein í þá beinu götu og það eina sem þarf að hnykkja á, er að staðfesta eignaraðild þessara fáeinu á auðlindum þjóðarinnar.

Atvinnurekendur með LÍÚ í broddi fylkingar, boða að þeirra ein von um bjarta framtíð sé staðfesting á eignarheimild kvóta, enda hafi útgerðarmenn lagt allt sitt líf og fjárfestingar í hann.
Það sem verkalýðsfólk þarf alltaf að muna, og minna á, er að þeir eru þátttakendur en ekki þiggjendur. Atvinnuvegir okkar og framtíðarhorfur byggjast á sameiginlegri þátttöku okkar allra, atvinnurekenda, stjórnvalda og hinna vinnandi stétta. Þetta er það mengi sem kemur okkur út úr kreppunni. Ekki staðfesting á eignaraðild kvótans.

Gömul kona fyrir norðan sagði eitt sinn, að hún hefði tekið eftir því undanfarin ár að ef hún lifði af mars þá lifði hún út árið.

Það má vonandi yfirfæra þessi orð gömlu konunnar yfir á baráttu vinnandi verkalýðs þessa dagana. Hann hefur þrátt fyrir allt lifað út árið þrátt fyrir þrengingar og efnahagshrun og ekkert hægt að gera nema að vona að svo verði áfram.

Viðurkennum og sannfærum stjórnvöld og síðast en ekki síst Okkur sjálf um að við erum þátttakendur en ekki þiggjendur í þjófélaginu. Þá fyrst getum við sannfært okkur um að við höfum vorvinda í fangið.

Takk fyrir.

Maístjarna

Ó hve létt er þitt skóhljóð
ó hve leingi ég beið þín,
það er vorhret á glugga,
napur vindur sem hvín,
en ég veit eina stjörnu,
eina stjörnu sem skín,
og nú loks ertu komin,
þú ert komin til mín.

Það eru erfiðir tímar,
það er atvinnuþref,
ég hef ekkert að bjóða,
ekki ögn sem ég gef,
nema von mína og líf mitt
hvort ég vaki eða sef,
þetta eitt sem þú gafst mér
það er alt sem ég hef.

En í kvöld lýkur vetri
sérhvers vinnandi manns,
og á morgun skín maísól,
það er maísólin hans,
það er maísólin okkar,
okkar einíngarbands,
fyrir þér ber ég fána
þessa framtíðarlands.

Texti: Halldór K. Laxness

Gleðilegt sumar

Sunnan yfir sæinn breiða
sumarylinn vindar leiða
- draumalandið himinheiða
hlær og opnar skautið sitt.
Vorið kemur, heimur hlýnar, hjartað mitt!

A a ...
Vorið kemur, heimur hlýnar, hjartað mitt!

Gakk þú út í græna lundinn,
gáðu fram á bláu sundin
- mundu að það er stutt hver stundin
stopult jarðneskt yndið þitt.
Vorið kemur, heimur hlýnar, hjartað mitt!

A a ...
Vorið kemur, heimur hlýnar, hjartað mitt!

Allt hið liðna er ljúft að geyma,
láta sig í vöku dreyma.
Sólskinsdögum síst má gleyma
- segðu engum manni hitt.
Vorið kemur, heimur hlýnar, hjartað mitt!

A a ...
Vorið kemur, heimur hlýnar, hjartað mitt!

Jóhannes úr Kötlum

menntun er máttur

Það er grundvallarmannréttindi hvers og eins að njóta jafnra tækifæra til menntunar, óháð efnahag og búsetu. Nú á tímum óvissu í efnahagsmálum þjóðarinnar skiptir miklu máli að styrkja stoðir menntunar í landinu. Menntun í heimabyggð er eitt að grundvallar atriðum þegar fólk velur sér búsetu, menntun á öllum skólastigum og aðgang að símenntun í starfi. Aðgangur að háskóla eða háskólasetri í hverjum landshluta skiptir þar miklu máli. Háskólamenntun gegnir lykilhlutverki í eflingu nýsköpunar og þróun atvinnulífs og öll menntun er driffjöður framþróunar og þannig er lagður grunnur að framtíðarhagvexti þjóðarinnar. Auk þess sem heilbrigt samfélag dafnar og þroskast í nánd við allar menntastofnanir og það eykur samkeppnishæfni svæða sem hafa yfir að ráða öflugum menntastofnunum.
Því skiptir það miklu máli að menntastofnunum sé tryggt áframhaldandi fjármagn til að starfa.
Á undanförnum árum höfum við fylgst með uppbyggingu háskóla og háskólasetra í kjördæminu og fengið að fylgjast með hversu jákvæð áhrif slíkt hefur á samfélagið í kring. Framsóknarflokkurinn hefur alltaf lagt áherslu á byggðamál og bent á þá sjálfsögðu staðreynd að það sé landi og lýð til heilla að öllum séu boðin jöfn búsetuskilyrði. Þar spila mennta og velferðarmál stóru lykilhlutverki. Framsóknarflokkurinn vill leggja aukna áherslu á háskólakennslu á landsbyggðinni með áherlsu á að sérstöðu hérðanna verði nýtt í sérgreiningu.

Halla Signý Kristjánsdóttir

Höfundur er í 5. sæti á lista Framsóknarflokksins í NV- kjördæmi

Björgum Heimilinum

Í gær var samþykkt lög um greiðsluaðlögun, þetta er tillaga núverandi ríkisstjórnar til að bjarga heimilunum í landinu, undan klóm kreppu og verðbólgurisans. Já þetta kemur til að með að koma 120 heimilum til hjálpar. Vá það er bara 1/3 af heimilum hérna í Bolungarvík. Já það er bara heilmikið.  Ég hugsa að það svona nokkurn vegin svo stór hluti heimila í Bolungarvík sem þurfi hjálp... gott hjá þeim. EN þá eru öll hin heimilin í landinu eftir sem marra enn í hálfu kafi en fá ekki náð fyrir augum yfirlýstar félagshyggjustjórnar.

Þetta er bara grín, ef þú átt í greiðsluerfileikum þá leitar þú til ráðgjafastöðvar heimilanna, (fyrsta báknið) ef það fær einhverja náð þar er það sent til héraðsdómara,, já já allir vita hvað það tekur langan tíma, einhverja mánuði. Þaðan fer það aftur til ráðgjafa og fylgir því ákveðin vitnisburður svo aftur til Héraðsdóms. Líklega verður þetta heimili orðið hálf bogið af hungri og eymd eftir alla þessa bið. þetta er í besta lagi grín í versta falli svívirðing.

Hvað er rauðgrænabyltingin  (einhenta ríkisstjórn VG og S) tilbúin að borga fyrir þessa meðferð og hver greiðir hana? Mér er spurn. Eitthvað kostar það, örugglega hægt að bjarga nokkrum heimilum í millitíðinni og fyrir það fé sem þarna fellur í vasa sérfræðinga sem eiga eftir að maka krókinn vel á þessari vitleysu.

En lög um að aflétta ábyrgðarmönnum af lánum fær mitt atkvæði.

Huppa

Í nýjasta bændablaðinu er sagt frá því að í háskólanum í Newcastle í Englandi séu þeir búnir að komast að því að kýr mjólki betur ef þær beri nöfn, eða s.s. heiti eitthvað. Huppa mjólki 258 litrum meira heldur en sú nr. 567 í ónefndum kúahóp.

Ályktun sem þeir draga af þessu er að kýr sem bera nafn þær fá meiri umhyggju og frekri meðferð heldur en NN kýrin og þess vegna afslappaðri.  Já þetta hélt ég að væru ekki ný sannindi. Á þetta ekki við um okkur tvífætlingana? ef við fáum  meiri umhyggju og meiri jákvæðari athygli þá afköstum við meira, sama hvar okkur ber niður. Á heimili, vinnunni, í skólanum og í samfélaginu.

Við skulum muna það, þrátt fyrir vetrarríki úti, hærri verðbólgu en eðlilegt er að við erum öll einstök og skilum okkar inn í samfélagið allt.

Það lá að

Mig dreymdi böns af hveitikökum í nótt, mér var boðið í hús hér í Víkinni og ég leit inn í skápa og allir skápar voru fullir af hveitikökum. Ég var að halda að þetta boðaði snjó,,,, hélt að væri komið nóg af því en viti menn um kvöldmataleytið var kominn glórulaus bylur. En konan sem bauð mér í hús í draumnum hét Björg svo þetta él birtir upp um síðir eins og öll hin.

Sjálfstæðismenn

Kassinn undir bréfalúgunni hjá mér er fullur hvern dag er ég kem heim úr vinnu. Björt og brosandi andlit á glanspappír blasa við mér, gefandi fögur en fá loforð um betri daga. Þetta er prófkjörslagur sjálfstæðismanna í NV kjördæmi.

En sú peningasóun og þetta er eitthvað svo mikið 2007. Ef maður opnar bb.is þá blasa við manni á alla kanta banner-auglýsingar svo aðrar fréttir skreppa saman eins og yfirtaka ríkisins á okkar ástkæru sparisjóðum. Svo eru greinaskrif stuðningsmanna, tvær til að tryggja fimmta sætið !!!!!!!

Sjálfstæðisflokkurinn er eini flokkurinn sem auglýsir í blöðunum fyrir prófkjör, æææ hvað þeir eru taktlausir eitthvað, svo lýsandi fyrir þá. Svo eru þeir líka farnir að klóra augun úr hver öðrum.

Ég vildi að frambjóðendur í NV hefðu notað þessa fjármuni í eitthvað vitlegra. Ég giska á að samanlagður kostnaður þeirra sé upp á nokkrar milljónir og þetta er bara prófkjörið, svo er kosningabaráttan eftir.

Sjálfstæðismenn vakna,,,, halló......

niðurstaða

Þá liggur fyrir niðurstaða póstkosningar hjá Framsóknarmönnum í NV kjördæmi. Ég stefndi í 1 eða annað sætið. Niðurstaðan er fimmta sætið. Ég er samt mjög sátt. Ég fór algjör lega blönk í þessa baráttu. Í þeirri merkingu að ég er í fyrsta sinn að bjóða mig fram í landsmálum í flokknum þrátt fyrir að ég hafi alltaf starfað mismikið þó á heimavelli. Ég lagði ekki  meira fé í kosningabaráttuna en bensín, eign orku og keypti nokkrar gistinætur hér og þar. Þess vegna finnst mér allt vera upp á við í þessu og mjög sátt við mitt. Takk fyrir kæru kjósendur sem krossuðu við mig 937 sinnum.

Auk þess vil ég sérstaklega þakka eiginmanni mínum honum Sigga Gumma sem hefur stutt mig til tunglsins í þessu auk stórfjölskyldum báðum  megin og vinum. Björgmundi Erni þakka ég sérstaklega mikla hjálp og stuðning.

Listinn sjálfur er bara flottur. Gunnar Bragi leiðir listann og er hann vel að því kominn. Ótvíræður leiðtogi og snjall stjórnmálamaður. Guðmundur Steingrímsson, er flottur í baráttusætinu og er flottur inn á þing fyrir okkar kjördæmi.

Ég lít svo á að Sindri sé varaþingsmannsefni og er flottur fulltrúi bænda meðal okkar.

Það verður þó að segja að ef við lítum á listann út frá kynjaskiptingu stöndum við frekar höllum fæti, það þurfti þó ekki að beita handstýringu um að koma kynjakvótanum á, en ekki gat það staðið tæpar. Elín Líndal búin að vinna óslitið í flokknum og gengt fjöldamörgum trúnaðarstörf fyrir hann hlýtur fjórða sætið. Í 75% tilfella var krossað við hana í 1-4 sætið, því öllum finnst rétt að listinn endurspegli rétta samfélagsmynd en þó svona bara til að vera með en ekki til áhrifa. 

Það er þó stórtíðindi í íslenskum stjórnmálum að um síðustu helgi skyldu fimm konur vera lenda í röð í kraganum.

 Ég hlakka til að vinna með þessu frábæra fólki sem ég er búin að vinna með síðustu vikur, líka þeim sem ekki náðu framalega, því allt var þetta  mjög frambærilegt og stórskemmtilegt fólk. Við öll leiðum listinn til sigurs 25. apríl nk.

Moka moka

Moka, moka, moka meiri snjó,, Þetta beið mín þegar ég kom heim, gott að eiga hraustan dreng sem getur hjálpað mér. Guðný Hildur nágrannakona mín smellti þessari af okkur. Var búin að vera á framboðsferðalagi um Vesturland um helgina og komst ekki heim á mánudagskvöldið en við hjónin vorum svo heppin, að stoppa í Reykjanesi og gista þar.  Þar sváfum við bara í norðanrokin og létum staðarhaldara stjana við okkur á allan máta. Keyrðum á mánudagsnóttina í tunglsljósi og stjörnubjörtu veðri, en Éljabakki hafði legið hérna yfir Bolungarvík og Ísafirði svo það var allt orðið ófært hérna norðan til eins og sést á þessari mynd.

Ég var s.s. á framboðsfundarherferð um helgina. Byrjaði hér á laugardaginn á Ísafirði, svo var fundur á sunnudagsmorgun á Akranesi og kl 16 í Borgarnesi. Þá var ferðinni haldið á Snæfellsnesið þar sem við tókum hús á Maggý og Dúna. Gott að hitta þau og spjalla aðeins. Maggý er að gera skemmtilega hluti á Nesinu sem ég er að hugsa um að kynna mér aðeins betur, þ.e. Átthagastofa, þetta væri tilvalið að koma hérna upp í Bolungarvík. Vantar bara frískt fólk að huga að þessu.

Á mánudaginn fór ég sem sannur frambjóðendi heim á nokkra bæi og hitti hressa bændur. Þá var svo fundur á Stykkishólmi um kvöldið og svo var haldið heim um nóttina sem áður sagði.

En heim er ég komin og fer ekki aftur fyrr en á föstudaginn......